摘要：所謂「明星飯局價」時有傳聞，金額由幾萬到幾百萬不等，但一直惹人側目。

所謂「明星飯局價」時有傳聞，金額由幾萬到幾百萬不等，但一直惹人側目。

無它。

呢啲所謂「明星飯局」，最容易令人聯想到嘅就係：咁嘅價錢，點止食餐飯咁簡單。

最近，又有多名TVB小花公開收到離譜邀約。

其中一位落選港姐，更被開價高達300萬「邀請食飯」。

1. 落選港姐，接連被問

參加過2020年港姐競選並進入10強嘅麥詩晴，就係其中一位收到邀請嘅TVB小花。

麥詩晴落選後加入TVB，憑著甜美形象獲得唔少關注。

佢早前喺社交平台公開自己收到「飯局邀約」嘅截圖。

對方以曖昧語氣表示想邀請佢赴約。

而另一位落選港姐，2017年港姐最後十強嘅梁雯蔚，早前同樣曬出類似邀約訊息。

梁雯蔚之前喺劇集《寵愛Pet Pet》中，著上小背心大曬驕人身材，備受矚目。

2. 娛樂主播，天價邀約

現任TVB娛樂新聞主播、有「學霸主播」之稱嘅賴彥妤。

日前同樣成為飯局邀約嘅目標。

賴彥妤畢業於英國高雲地利大學法律系碩士，所以有「學霸主播」之稱。

佢曾於2019年奪得英國華裔小姐冠軍，並於2021年參選港姐落選後加入TVB。

賴彥妤日前公開私訊嘅截圖，訊息來自一位自稱「香港XXX娛樂文化有限公司經理人」嘅人士。

有趣嘅係，呢個帳號嘅頭像，與此前騷擾梁雯蔚及麥詩晴嘅人係一模一樣。

似乎係一個專業嘅「飯局邀約團伙」。

而當對方詢問賴彥妤有冇興趣接Job嘅時候，賴彥妤好客氣咁問佢係咩類型嘅工作。

對方即刻開宗明義、言簡意賅、相當直白咁表示：「Dinner 300萬。」

雖然面對著300萬嘅誘惑，但賴彥妤毫不猶豫拒絕。

佢亦喺帖文中表達堅定意志：「究竟要問幾多次 問幾多都一定係say no 應該報警定報東張 冇咩事我都係返去拍劇先。」

喂喂喂，300萬、300萬喎。

唔係話勁多，不過「食餐飯」就可以財務自由，唔使喺TVB摸爬滾打捱驢仔。

又的確有好大吸引力——如果真係「齋食飯」。

3. 視后花旦，齊齊被問

其實，TVB藝人遭遇飯局邀約並非乜嘢新鮮事。

早年，「視后」蔡思貝都曾透露過，有人出價200萬邀請佢共赴飯局。

而莊思敏更直言自己曾經收到過1200萬嘅天價邀約。

佢話，金額之高，連佢本人都覺得匪夷所思。

4. 真假難辨，食吓花生

雖然明星飯局價，起碼存在咗幾十年。呢啲嘢對於唔少藝人嚟講，一早就耳熟能詳。

無論係抵擋住天價誘惑，定係公開發聲拒絕，佢哋嘅回應，都係一種自我保護。

不過話又講翻轉頭，呢啲爆出嘅所謂「天價飯局邀約」，究竟有幾多係真？又有幾多係假？

實在只有當事人先至清楚。

因為始終無法排除有某啲藝人，利用呢種話題嚟自我炒作，博取新聞曝光，增加自我宣傳。

不過既然係食花生，就唔係話信定係唔信。

抱住呢個態度或者更好：信住先，當睇戲。

最好係上埋《東張西望》一齊踢爆呢個局，就最好戲啦。

来源：易眼